De maior quero ser turista #2: This is... Miroslav Sasek

Que mellor para escapar destas xornadas de diluvio universal que darnos unha volta por Roma, Hong Kong, Nova York, París... ? ou mesmo deixarnos arrastrar ás viaxes espaciais con saída en Cabo Cañaveral? Todo isto e moito máis podemos facelo da man dos case 20 "libros-guía" do ilustrador checo Miroslav Sasek (Praga, 1916-1980) que integran a serie "This is...".

Sasek tiña claro que el de maior quería ser artista. Sen embargo, a oposición dos seus pais faría que nun principio se conformase cos estudios en arquitectura. Os anos pasan e en 1948, cando o partido comunista chega ó poder no seu país natal, trasládase a Munich onde residirá gran parte da súa vida.

 

A súa faceta como ilustrador comeza a finais dos anos 40, pero cobrará forza a partires de 1959. Nunha viaxe a París observou que os pais que viaxaban cos seus fillos estaban totalmente absorbidos polo rol de turistas e decidiu crear unha obra dirixida ó público infantil coa que aproximar ós rapaces non só á historia das cidades, senón invitalos a recrearse tamén nas curiosidades de cada lugar. Así nace "This is...", inicialmente concibida como unha serie de tres libros: This is Paris, This is London e This is Rome. O éxito rotundo co que foron acollidas, fíxo que Sasek prolongase este proxecto ata o ano 1974, firmando un total de 18 títulos dos que tan só rompen o esquema común de "guía de viaxes" os volumes adicados ás Nacións Unidas e This is Historical Britain, logo retitulado This is Britain.

Tódalas viaxes de Sasek seguen unha estructura máis ou menos común, primeiro visitando os lugares dos que oeu falar ou sobre os que leu, para logo apropiarse da curiosidade propia dun neno e iniciar unha verdadeira tarefa exploradora na que cobran forza as particularidades e pequenos detalles que fan única cada cidade, indo moito máis aló do "monumento estrela". Si, as cidades de Sasek están habitadas por monumentos, pero tamén por persoas, os seus oficios, a súa comida, as súas tendas, pequenas estradas, medios de transporte... Todo isto plasmado cun fantástico e divertido estilo que convirte estes volumes en auténticas xoias.

 

+ info: http://www.miroslavsasek.com/

Tammis Keefe

1933-1934: Chicago acolle unha Feira Mundial para celebrar o centenario da cidade. Unha visita ó Chicago Arts Institute durante este evento cambia a vida de Margaret Thomas Keefe (1913-1960), máis coñecida como Tammis Keefe. A partires deste momento abandona os seus estudios de matemáticas e encamiña a súa formación cara a pintura no que hoxe é o California Institute of the Arts.

Durante a II Guera Mundial combinou os traballos de publicidade e packaging coa dirección artística da revista Arts&Architecture. Keefe destacou de seguido polo seu talento, que non pasou desapercibido para Dorothy Wright Liebes, deseñadora de textiles considerada a nai do tecido moderno, que lle ofreceu un posto como colorista e deseñadora nos seus estudios, primeiro en San Francisco e logo en Nova York.

 Pódese dicir que a súa época dourada comeza nos anos 40, a raíz dun agasallo para unha amiga. Keefe deseña un pano da man para regalarlle polo seu aniversario e esta sería a que se encargaría de dalo a coñecer ante Lord&Taylor e J.H. Kimball, grandes referentes na industria textil nos Estados Unidos. Kimball encargou 6 deseños e ante a fantástica acollida do público Keefe non frenou a súa actividade, realizando centos de proxectos entre 1944 e 1960. Aínda que a súa producción abarcou distintos campos -panos para a cociña, fulares, papel de parede, manteis, servilletas, postais navideñas, xogos de cartas, cristalerías, vaixelas, cortinas, tapizados, roupa de cama...- o seu producto estrela, sen dúbida, serían os panos da man. 

Todo partía dun deseño a lapis en papel cebola que transfería a través dunha caixa de luz ou papel de calco á superficie que logo coloreaba mediante acuarelas -normalmente en 4 ou 5 cores- e que se empregaría como orixinal para a impresión dos tecidos en liño. Os temas dos seus panos son variopintos: dende aqueles inspirados polas súas viaxes -Oriente, Asia, Europa, cidades americanas...-, ata todo tipo de animais, plantas, flores, música, seres mitolóxicos, antigüidades, oficios, e por suposto, edicións especiais para Nadal, Pascua, San Valentín, calendarios, cumpreanos....

 Nunha época na que entraba con forza o "usar e tirar" do kleenex co seu lema "Don't Carry a Cold in Your Pocket ", os compradores esperaban ansiosos os novos deseños de Keefe, que chegaron a converterse en auténticos obxectos de colección utilizados incluso para decorar as casas. A firma de Keefe nos panos era un éxito asegurado e, aínda que tamén realiza traballos baixo a sinatura de Peg Thomas, non podían venderse na mesma liña que os Tammis Keefe. 

Evidentemente as claves deste éxito foron o talento e os deseños de Keefe, a súa frescura e o seu dominio da cor; pero a pesar disto non deixaba nada á improvisación. Aínda que traballaba sen un equipo, contratou unha famosa publicista da industria da moda, Rea Lubar, que axudou a dar un empuxón se cadra aínda máis forte á súa carreira. Mediante notas de prensa que se difundían a diversos xornais en Estados Unidos e Canadá nas que se destacaba a importancia destes accesorios de moda e o estilo revolucionario de Keefe, mantivo a súa figura e deseños no centro de atención . 

A pesar da enorme repercusión na época e da gran cantidade de obra realizada na súa corta traxectoria, hoxe en día non hai demasiada información sobre esta fantástica artista.

Para ver máis exemplos dos seus deseños de panos da man, manteis e panos de cociña: http://www.tammiskeefe.com/

Lubomír Štěpán

Ilustracións do checo Lubomír Štěpán publicadas en 1965.

De maior quero ser turista: Maurice Laban

Hoxe inauguramos "De maior quero ser turista", unha sección adicada a postais, carteis ou calquera tipo de ilustración creada para promocionar viaxes ou simplemente amosar ó resto do mundo as particularidades de determinadas cidades ou países.

O invitado de hoxe é Maurice Laban, que realiza en 1959 estas maravillosas ilustracións sobre países europeos nas que representa o traxe tradicional, edificios icónicos ou outros estereotipos asociados a cada rexión.

Unha boa forma de viaxar gratis...